اتقوا الله في مصر وفي الجزائر وفي الامة العربية

والله يا جماعة مش عارف اصدق مين ، بس الفكرة انه لحد دلوقتي مشفتش لقطة فيديو واحده على الاعتداءات دي وبعدين يقولوا تلات مصابين ولما كرامتنا كده وجعتنا فجاة كان فين كرامتنا لما المصريين بيتهانوا في كل حتة وفي كل بلد ولما الواحد منهم يروح لسفارة بلده تقوله اصلكم كتير ومينفعش نحميكم كلكم ؟، كانت فين الكرامة لما الصيادين المصريين احتجزوا من قبل القراصنة الصوماليين وكان رد الخارجية المصرية انها ملهاش دعوة ولموا من بعضكم وادفعو الدية اللي طالبنها ولما الصيادين حررووا انفسهم بانفسهم كانت النتيجة يا سادة ان الحكومة المصرية سلمت القراصنة الذين احتجزهم الصيادين المصريين مش عارف لمين ؟ تصوروا دي كرامة المصري كنتوا فين وكنتوا فين وكنتوا فين لو عاوزين اقعد من هنا للصبح عشان اعدد اهانة كرامة المصريين بعلم الحكومة المصرية هبقي عاوز كتب مش فيس بوك واحد ، اللي عاوز اقوله مش عشان رغبة مصرية في التقارب مع الاسرائليين والامريكان وتجريد مصر من قوميتها تكون ردة الفعل بهذا الشكل والحجة غير المعلنة هي ان احنا اتهزمنا في السودان ، ونكون غرف عمليات ويطلع بعض مرشدى الامن في وسائل الاعلام يطالبوا بقتل الجزائريين في مصر ، ما هذا العبط ما هذا العبط انتم بتضحكوا على مين ، اتلموا بقه وبطلوا ارف كتكم الارف ، دول الجزائريين مهما غلطوا لن يكونوا مثل الاسرائيليين الذي يقتلون ابناءنا كل يوم على الحدود وعندما نتحدث عن طرد السفير يقولون لنا السياسةوالمصالحة والتهدئة وكلام فارغ زي كده انما مع الجزائر تاني يوم كان السفير مسحوب .. دا ايه الحمية اللي ظهرت فجاة دي وايه الكرامة اللي ظهرت عندكم على كبر دي .. العبوا غيرها كتكم الارف .
وبعدين لو انتم فعلا ناس محترمه كنتم امنتم الفرقة الجزائرية او على الاقل حاسبتم المقصرين امنيا اللي سمحوا لبعض من الصبية بالقاء الحجارة على الضيوف ، في حراسة قوات الامن ، يعني لو دي عربية مسئول من العصابة الحاكمة مكنش حد قدر يهوب ناحية العربية لكن نقول ايه في الامن المصري الواعي اللي سمح بحماقة القاء الحجارة على الضوف .ونسوا ان هذا التقصير هو سبب الازمة الحقيقي والذي ادى الى اشعال لنار مع شعب جزائري معروف عنه اصلا بحكم البيئة والمناخ والموقع انه سريع الغضب وشديد الحساسية وعنيف بطبيعته ، حاسبوا انفسكم الاول قبل ان تحاسبوا الجزائريين وتنصبوا لهم المشانق ، انا طبعا لا اعفي الجزائريين من المسئولية بشكل مطلق لكن فقط اريد ان توضع الامور في نصابها ولا ننسى ونحن في زروة غضبنا على خروجنا من المونديال اننا ايضا مقصرين امنيا وفنيا ايضا ولكم ان تلاحظوا ان منتخب الجزائر في معظمه من الشباب اما نحن فاعمار لاعبينا تجاوزت بعضها الثلاثين عاما فهل هذا معقول اما آن للرجل ان يستريح ويسلم الراية لجيل من الشباب قادر على حصد بطولات اخرى .